PAILIMON KUIMP TEPA IK KɄⱠ

Ya Buk Ei Nga Puⱡ Ei:

Wu Pailimon ndi, kindmant wu Onesimas nung nimba purum uⱡ ei nga nit mbᵾ pendpa kelpa, mondpa pili wu ᵾngᵾn mel rukᵾr tangga.

Ya Buk Ei, Nam Ndi Rurum:

Ya buk ei, Pol ndi rurum.

Mon Ropa Nam Ngurum:

Ya mon ei, Pol ndi, ropa Kolosi kona ila mondpa pili wu Pailimon ngurum.

Ui Nant Ila Rurum:

Mon ei, Pol Rom kona ila kan manga ila pepa rurum. Ei Kraist metᵾng ei kᵾn, mbuldung pana 60 ila mon kᵾⱡ rurum.

Ik Ronduⱡ: Pailimon 1:15-16

Onesimas unt nim ui onunga kot ila, wak ropa purum. Ei wote, nim kᵾn yant omba ui roⱡ etpa moⱡmba ei nga itim. Akup Onesimas kindmant wu mel morum. Wote, Kraist nga mbi ila wu ei, akup kindmant kongun ei, tᵾpa mana ndurum. Akup wu ei, Kraist nga ᵾngᵾn mendpᵾⱡ ei morum ku. Ei nga, na ndi, wu ei numan ngont. Ei mel, nim ndi, i ku etkᵾn, numan minal ku ngui. Nambuⱡ emel, wu ei, kindmant wu moⱡpa, wote Nuim ei nga mbi ila, wu ᵾngᵾn mendpᵾⱡ ei morum.

IK PENG KɄⱠRump1:1-1:3 - Pol ndi, mon ti ropa, Pailimon ngurum1:4-1:7 - Pailimon nga wamp numan ngui uⱡ ei kᵾn, mondpa pili uⱡ ei kᵾn1:8-1:22 - Pol ndi, Onesimas kᵾn wuldᵾtᵾm1:23-1:25 - Rawe etpa ik mat nitim

Philemon

Pol Ndi, Mon Ti Ropa Pailimon Ngurum

1Na Pol, Kraist Jisas nga nᵾndᵾp kan manga ila pet wu ei kᵾn, tᵾn nga ᵾngᵾn Timoti kᵾn, mon ei ropᵾl rop, nim Pailimon tᵾl nga kongun wu ᵾngᵾn ei kᵾn, tᵾn nga kimᵾn amp Apiya kᵾn, wote tᵾn nga el wu ᵾngᵾn Arkipas kᵾn, wote nim nga Got nga mang rapa tenda ila wamp nᵾk mormun kᵾⱡ kᵾn, mon ei rop ngonumbᵾⱡ.

3Tᵾn nga Got Wuta kᵾn, Nuim Jisas Kraist nga poⱡ ti uⱡ ei kᵾn, numan wang ndui uⱡ mbᵾ, enim kᵾn kan piyangga.

Pailimon Nga Wamp Numan Ngui Uⱡ Ei Kᵾn, Mondpa Pili Uⱡ Ei Kᵾn

4Ui mbila rᵾk rᵾk na atinga rop, nim mbi tep angᵾndᵾp, na nga Got kᵾn angge nᵾt. 5Ei nambuⱡ emel, na pᵾt ei, nim ndi, Got nga wamp mbᵾ, numan ngukᵾn, omba Nuim Jisas ei mondᵾk pᵾtᵾn ku. 6Na ndi, Got kᵾn atinga rop mawa elimba! Nim nga mondpa pili ei, etpa ronduⱡ mundangga, nim nga pilpa kungᵾndi omba kun pangga! Wote, nim pilkᵾn molkᵾn, uⱡ kun kai mbᵾ tᵾn ndi mbun, Nuim Kraist ei kᵾn, memp kai mbᵾ tᵾtmᵾn ei mel nim tin. 7Wu ang ye! Nim nga wamp numan ngui uⱡ etᵾn ei ndi, na ronduⱡ nguⱡnga, numan kai pilip mor. Nambuⱡ emel, nim ndi, Got nga wamp mbᵾ kᵾn, etkᵾn numan kai pendᵾtᵾn.

Pol Ndi Onesimas Kᵾn Wuldᵾtᵾm

8Ei nga, wote na ndi, nim kᵾn numan ei mel pᵾt. Nim uⱡ kun kai tenda ti itᵾn ei, Kraist nga mbi ila na ndi, nim kᵾn, ronduⱡ mondᵾp man ngump namp. 9Wote, na i etᵾp ni nᵾnimp. Na wamp numan ngui uⱡ ila nim kᵾn ik raka raka nᵾmp namp. Kupa, na Pol ei, akup anda etᵾp, wote Kraist Jisas nga, kan wu ei mor. 10Na ndi, nim Pailimon waldᵾnt ei, na nga kangᵾm Onesimas nga pili! Ei nambuⱡ emel, na kan manga ila pit ei kᵾn, Kraist nga mbi ila na kang ei nga tipam ei mur. 11Unt kang Onesimas nim kᵾn uⱡ ingk ti, iti nᵾtᵾtᵾm mon. Wote, akup nim nga kep, na nga kep, tᵾpa rᵾpᵾndi wu kai ei morum. 12Akup Onesimas nim ngump int ndont. Na nga numan ei, wu ei kᵾn pendᵾp ngont. 13Na Got nga Rᵾnang Ik Kai ei nga nᵾmp, kan manga ila pit ei kᵾn, nim nga koⱡ ila wu Onesimas, na tᵾpa rapundpa moⱡpa, wote got nga ik ei nindimp. Unt nim itin uⱡ ei mel etangga! 14Wote na ndi, nim kᵾn ronduⱡ mondᵾk, na tᵾkᵾn rᵾpᵾndi ni nᵾnimp mon! Na kᵾn uⱡ kai mat itimp nᵾkᵾn pin mbᵾ, nim ninim numan ila pin ei mel iti. Na uⱡ ti itimp ei nim ndi, kapⱡa nana mint itimp. 15Onesimas unt nim ui onunga kot ila wak ropa purum. Ei wote, nim kᵾn yant omba ui roⱡ etpa moⱡmba ei nga itim. 16Akup Onesimas kindmant wu mel morum. Wote, Kraist nga mbi ila wu ei, akup kindmant kongun ei, tᵾpa mana ndurum. Akup wu ei, Kraist nga ᵾngᵾn mendpᵾⱡ ei morum ku. Ei nga, na ndi wu ei numan ngont. Ei mel ku, nim ndi, i ku etkᵾn, numan minal ku ngui. Nambuⱡ emel, wu ei kindmant wu moⱡpa, wote Nuim ei nga mbi ila, wu ᵾngᵾn mendpᵾⱡ ei morum. 17Wote nim Pailimon, na Pol tᵾl wu raⱡ, Kraist kᵾn kongun tenda ila etᵾmbᵾⱡ. Nim Pailimon ndi, Onesimas rawe etkᵾn yant ti! Uⱡ ei, na rawe etkᵾn tin ei mel ku! 18Wote, wu ei ndi, nim kᵾn uⱡ mat etpa ⱡawa mundrum ndam kep, wote elim nga mel punt mat, nim kᵾn pem ndam kep, kᵾmp kᵾm na kᵾn nana, na ndi, punt ruimp. 19Na Pol ndi, nanim nga ki ei ndi, ya mon ei rop ngunt. Ei kupa, na ndi, nim punt ruimp. Nim Kraist kᵾn kont pukᵾn morᵾn uⱡ ei, na kᵾn punt mam ti morum. Ei nga, nim ei ndi, namba etkᵾn punt ruin? Ei kapⱡa mon! Ei nga, na ik ei nga ni nanimp, mon! 20Wu ang ye! Na uⱡ ti numan mondunt ei iti. Na Nuim ei nga mbi ila, nim nga ᵾngᵾn ei, na mor nᵾkᵾn, na etkᵾn numan ei wang ndukᵾn, Onesimas rawe etkᵾn ti. 21Wote, na pᵾnt ei, nim uⱡ nᵾnt ei mel, kapⱡa itin ei nga pilip, ya mon ei rop ngont. Wote, nint uⱡ ei mel etkᵾn, uⱡ mat pendkᵾn itin mbᵾ, na pilip mor. 22Ei kᵾn ku, manga ti kandkᵾn, tᵾkᵾn tekᵾn muⱡi! Ei nambuⱡ emel, Got ndi, enim nga atinga rormin ei punt ropa, na kelpa enim kᵾn int ndupa ngumba.

Rawe Etpa Ik Mat Nitim

23Wu Epapras na kᵾn, rᵾp ropᵾⱡ, Kraist nga mbi ila kan manga ila petᵾmbᵾⱡ wu ei ndi, enim kᵾn rawe enim. 24Na nga kongun wu ᵾngᵾnᵾl rᵾp rop andurmin wu Mak, Aristarkus, Dimas, Luk mᵾn kᵾⱡ ndi, enim rawe enmin ku.

25Nuim Jisas Kraist nga wamp poⱡ ti uⱡ ei, enim nga muⱡnga orunga piyangga! Ei kupa!